اليكم هذه القصيدة بحق ام ابيها (عليها السلام)
وهي من الشعر الشعبي للشاعرعلاء
نزل نص الاله الكوثر اعطيناك ..وشكد انت عظيم وشانئك ابتر
مايحتاج ادور بالنص شمقصود ...اذا مقصود بالنص فاطمة الكوثر
يابضعة محمد انتي اول نور ... من وجه الرسالة بوجهج اتصور
كالاهه النبي جنة انبنت علكاع ...وانتي الجنه بين البيت والمنبر
المثقال الوصف مو بس لساني يحير ..الكون يصير كله لسان مايكدر
وماوصفج ذهب والذهب لوله عيون ..جان من الخجل من شايفج زنجر
بجفوفج غداً باب الشفاعة يصير.. وباب جفوف ايديج من السماء اكبر
يايوم اليمر ومايمر جبريل ,,,ليكم يعتني وبالبيت يتعطر
وماقرر ابوج وزوجج كرار ..من حيدر زواجج ربج القرر
اختارالج اسد والكعبة طلكَت بي ..والكعبة تشرفت من طلكَت بحيدر
واكراماً الج ربج بعث جبريل ..بزفة من السماء وللأرض تحضر
يانور اليلوك الفاطمة الزهراء ...بس حيدر يلوك يكمل المنظر
شكد نادى الرسول وصاح بأعلى الصوت ..مني فاطمة والحبهه مايخسر
بس مات الرسول انكشف اصل الناس .. طلع زور الصحابة ولونهه تغير
يحرمونج فدك وكل الكون لأجلج صار وهذا الكون لأجلج فاطمة تسير .؟
الصابج وي محمد ماكل بماعون ..وملح زاد الرسالة شلون ماغزر
ومن يوم السقيفة انكسر ضلع الدين ...ولليوم الكسر مايرضه يتجبر
باجر بالحشر ينحشر زين وشين ..وانتي لوحدج ينقاملج محشر
عينيني عله وصفج لان كله اعجاز ... كل هذا قليل وبعد بيه اكثر
مولاتي من اعاتب خاف ااثر بيج ..واخاف اتجاوزت مولاتي اتعذر
كل هذا الفضل والكوثر بيمناج ,,ومن العطش جبد الحسين انطر
مااعاتب واكلج يعني والمفروض ..واخاف الحكمة بالمكلوب تتفسر
بس حسين لو من ربه طالب ماي ..جا خله السمه تمطرله بس انهر
وجا كل نهر بالجنه نزل علكاع ..وجا لحسين ربج نزل الكوثر